«Алатау сұлтаны » сайысы

Қазақстан Республикасы

Алматы қаласы

«Алатау» республикалық балалар клиникалық санаторийі

Тәрбие-оқыту бөлімі

Тәрбиеші Марал Мұратқызы Имашова

Мектептен тыс мәдени-іс шара

«Алатау сұлтаны » сайысы

Мақсаты: Ата салтын насихаттай отырып, нағыз қазақ жігітінің  бойындағы қасиеттерімен таныстыру. Әр баланың бойындағы қабілеттерін: ойлау, әр түрлі жағдайлардан шыға білу, өнерін көрсету, тапқырлық, сахна мәдениетін  қалыптастыру, дамыту. Ата салтын ардақтайтын, өз елін сүйер нағыз қазақ жігітінің қасиеттерін бойына сіңіре білер ұрпақты тәрбиелеу. Балаларды актерлік шеберлікке, ұйымшылдыққа, әдептілікке үйрете отырып, сахна төрінде өзін -өзі еркін ұстауға бейімдеу. Жеті қырлы, бір сырлы сұлтандарды анықтау.

Қолданылған көрнекіліктер: ән жинағы, карточкалар, мадақтамалар.

Тәрбиеші сөзі:  Қайырлы күн! Құрметті демалушы ата- аналар, қызметкерлер және топ балалары!  «Алатау сұлтаны » сайысына  қош келіпсіздер!

Уа халайық, халайық!                                                                                                           Мұнда назар салайық                                                                                                                  Ата жолын жалғамақ                                                                                                                  Ел намысын қорғамақ                                                                                                                                          Жігіттер шықсын ортаға                                                                                                      Бүгін сұлтан атанбақ                                                                                                            Қайсысы күшті, қайсысы әнші                                                                                     Талабына қарайық                                                                                                             Кімдер зерек, кім жылдам                                                                                                Таланттарын табайық!  —  дей  отыра сахна төріне ән ырғағыменен  сұлтандарымызды шақырамыз. Ду қол шапалақпен қарсы алайық!                                                                                  (қатысушылар кезекпен сахнаға шығады).

Сайыстың барысы: Бұл сайыс 2-3  топ, яғни  10-11 жас аралығындағы ұл балаларының арасында жүргізілетін сайыстың бір түрі. Балаларға бір апта бұрын үй тапсырмасы  беріледі.

Үй тапсырмасы: 1.Таныстыру  3 тілде: қазақ тілі, орыс тілі, шет тілінде тақпақ түрінде ойлап құрастырса, өзін- өзі жан жақты таныстыру.

2. Өз өнері: ән, би, белгілі бір аспапта ойнау немесе мәнерлеп оқу мәнерін көрсетуге дайындалу.

Сайыстың кезеңдері:                                                                                                                           Тәрбиеші сөзі:  Сайыс 5 кезеңнен тұрады. Әр кезең басталмас бұрын толық анықтама беріп  отырамын, қазір сіздерге әділ баға беретін әділ- қазылар алқасымен  таныстырып  өтейін. (бүкіл әділ- қазылар алқасымен таныстырылады).

Жігіттер, ойын арзан, күлкі қымбат,

Екі түрлі нәрсе ғой сыр мен сымбат.

Арзан, жалған күлмейтін, шын күлерлік,

Ер табылса, жарайды қылса сұхбат, — дей отырып                         «Алатау Сұлтаны» сайысын бастаймыз. Сайыскерлерімізге сәттілік тілейміз.

1-кезең:

Ақыл көрік — бойларында жетеді,

Әлі талай сынақтардан өтеді.

Мына отырған баршаңызды өзімен

Тез арада таныстырып өтеді, — деп, Сайысымыздың бірінші бөлімі  «Жеті атасын білген ер, жеті жұрттың қамын жер…». деп аталады. Сайысқа қатысушы жігіт сұлтандары өздерін таныстырып өтеді.  (қатысушылар берілген кезек арқылы өздерін толық таныстырады).

2-кезең:

Мықты болсаң білімінді сынап көр,

Келді кезек тапқырлықты танытар.

Бұл сыннан да өтсең егер сүрінбей,

Жүлде сенде, қуана бер, күлімде – «Білімді мыңды жығар» демекші                «Мақал- мәтелді аяқта»: әр сайыскерлерге карточкалар таратылады. Әр карточкада мақал -мәтелдің басы жазылған, әр сайыскер берілген                     мақал- мәтелдің  соңын аяқтау керек. (Ән ырғағымен әр қатысушы карточка алып, ойланып жауап береді).

3-кезең:

Ал кімнің өнері бар қаншалықты,

Би билеп, ал біреуі ән салыпты.

Сұлтандар жарысынан бәйге алуға,

Жігіттер аянбай- ақ жан салыпты.  «Өнерлі өрге жүзер »: әр сайыскер бала өз өнерін  сахна төрінде көрсете білуі қажет. Ән айтып, би билеп, өлеңді жатқа айтып және де аспап түрінде ойнап беру, яғни өз өнерлерін паш ету. Балалар келесі кезекке дайындалу үшін, сахна  сыртына шығарып салайық, әр қатысушыға ду қол шапалақ, қошемет көрсете отырайық.                                                                                                                                                                                                                                    (әр қатысушы кезек бойынша өнерлерін паш етеді)

4- кезең: «Мен елімді қорғаймын»: — Қазақстан азаматы өз елін, жерін қорғауға міндетті екенін бәріміз білеміз, келесі кезекте ән ырғағыменен сахна төрінде бой түзеп, әдемі жүріп, келешекте қандай солдат болатынын сіздерге көрсетеді.Қабыл алыңыздар.

5-кезең:

Ат өнері білінбес,

Бәйгеге түсіп жарыспай

Ер өнері білінбес,

Қоян- қолтық алыспай.

Сайысымыздың келесі түрі «Қол күрес»: бұл кезеңде 2 сайыскерден ортаға шығып, күштерін сынап, қол күрестіреді.                                                                                                 –мінеки біздің қатысушыларымыз өздерін жан -жақты көрсетті, енді                    әділ- қазылар алқасының қорытынды бағасын естиік.

(әділ- қазылар алқасы сөз алып, әр қатысушыны марапаттайды).

                   «Алатау сұлтаны » сайысының жеңімпазы анықталады.